dumbboy: OL小姐 and AV先生 - 愛的故事(上集)

話說我有一位相識十多年o既朋友，姑且稱呼佢做 OL小姐。大家唔講得話好熟落，但係由於大家都係o係同一team工作，我同佢頗會以兄妹相稱。

當年大家離開o左共事o既舊公司之後，佢搌轉加入o左一間英資公司。

o係呢間英資公司裡頭，有個英籍上司，姑且稱呼佢做AV先生。

AV先生已婚，亦有仔女。AV先生被英國總公司調派o黎香港分公司工作，而妻兒則留o係英國，每逢長假期至有機會一家團聚。

AV先生為人頗健談，可能佢為o左令公司上下打成一片，經常宴請下屬。OL小姐，自然亦係當中o既一份子。

o係一個偶然機會之下，AV先生向OL小姐提出單獨約會o既要求。
原本，AV先生係同時邀請OL小姐及佢o既一位女同事，但係由於該位女同事因事爽約，所以促成呢次 one on one 單獨約會。

當時，OL小姐向我提及呢件事，而我比佢o既意見係 - 叫佢拒絕。我提醒佢要盡力避免同佢呢位男上司單獨約會。因為呢o的case，通常好容易會"一發不可收拾"。

不過，OL小姐佢堅持唔會有問題，佢所持理由係: AV先生並唔係佢所喜歡o既類型。

之後，佢地開始o左單獨約會。

跟住落o黎o既幾個星期，OL小姐o係網絡上消失o左。

到佢再出現o既時候，字裡行間頗有對此事避而不談之意; 但後來，可能因為苦無傾吐對象，佢向我透露，佢同AV先生發生o左感情。(待續)